Hvað er rofaþjálfun?
Rofaþjálfun er ferli þar sem einstaklingur lærir að nota einn eða fleiri rofa til að stýra tækjum eða tölvuforritum. Rofi er einfaldur hnappur eða skynjari sem kemur í staðinn fyrir hefðbundna mús. Markmiðið er að læra að eigin aðgerðir hafi áhrif á umhverfið (orsök og afleiðing) og efla færni í að stýra tækjum.
Fyrir hverja er hún?
Rofaþjálfun nýtist þeim sem eiga erfitt með að nota hendur eða fingur af nákvæmni vegna hreyfihömlunar. Þetta á jafnt við um börn sem eru að læra undirstöðu tölvunotkunar og fullorðna sem þurfa nýjar leiðir til að stjórna sínu umhverfi eða tjáskiptatækjum.
Hugmyndir að skemmtilegri þjálfun
Best er að byrja á verkefnum sem vekja áhuga og gleði. Hér eru nokkur dæmi:
- Orsök og afleiðing: Nota rofa til að kveikja á leikfangi, blásara eða ljósi.
- Tónlist og myndbönd: Nota rofa til að ræsa og stöðva myndbönd á YouTube eða spila tónlist.
- Leikir á netinu: Það eru til margar vefsíður með leikjum sem eru sérhannaðir fyrir rofanotendur.
Góðar leikjasíður fyrir rofaþjálfun
Hér eru nokkur dæmi um síður sem bjóða upp á spennandi verkefni:
- Ginger Tiger – Ýmsir leikir til að nota með rofa eða stýripinna. Í boði eru nokkrir fríir leikir en hægt er að kaupa aðgang að fleirum.
- HelpKidzLearn – Fjölbreyttir og litríkir leikir sem þjálfa mismunandi færnistig. Leikirnir henta bæði fyrir PC og iPad. Skráning er nauðsynleg og í boði eru mismunandi áskriftarleiðir.
- Shiny Learning – Margir mismunandi leikir. Nokkrir leikir eru ókeypis en til að fá aðgang að öllu efninu þarf áskrift.
- Special Bites – Einfaldir og ókeypis leikir sérstaklega hannaðir fyrir rofaþjálfun.
Hvernig á að velja rétta rofann?
Mikilvægt er að finna hvar á líkamanum hreyfingin er áreiðanlegust. Rofanum þarf ekki endilega að vera stýrt með hendi, heldur er hægt að nota höfuð, hné eða fót.
Hvar fær maður aðstoð?
Hjá TMF er hægt að fá ráðgjöf um úrval rofa og hugbúnaðar. Þar er hægt að prófa nokkrar mismunandi lausnir til að finna hvað hentar hverjum og einum best.