Ingólfur Már hefur lengi verið virkur í félagsstarfi. Í dag situr hann í stjórn Heyrnarhjálpar, er fulltrúi í mannréttindaráði Reykjavíkur og tekur þátt í aðgengishópi ÖBÍ – réttindasamtaka. Ingólfur hefur lifað með heyrnarskerðingu frá barnæsku. Hann hefur því upplifað þá miklu byltingu sem orðið hefur á heyrnartækni með tilkomu snjalltækja.
Framan af voru heyrnartæki gjarnan fyrirferðarmikil. Í dag eru þau nánast ósýnileg tæki sem tengjast öðrum snjalltækjum áreynslulaust. Snjallheyrnartæki magna ekki bara upp hljóð í umhverfinu heldur geta þau líka tekið við hljóði frá öðrum tækjum. Það gerir þau gagnleg við fjölbreyttar aðstæður. Ingólfur Már notar snjallheyrnartæki sem er tengt bæði við símann hans og snjallúr. Þegar síminn hringir birtist númerið á snjallúrinu og Ingólfur getur svarað með því að þrýsta á heyrnartækið. Því þarf hann ekki alltaf að vera með símann við hendina, heldur getur hann haft hann í vasanum eða þá getur hann legið í allt að 20 metra fjarlægð.
„Miklu þægilegra að geta fengið öll skilaboð til dæmis í úrið og ég þurfi ekki að vera með símann alltaf uppi við.“
Ingólfur notar heyrnartækin einnig eins og hefðbundin Bluetooth-heyrnartól til að hlusta á tónlist eða hlaðvörp í símanum. Tækin ná líka hljóði beint úr sjónvarpinu. Með því að fikta sig áfram hefur hann náð að nýta þetta eina hjálpartæki ótrúlega vel. Hann notar til dæmis símann sem hljóðnema með því að nota annan samskiptabúnað sem auðveldar honum að fylgjast með á fundum. Ingólfur Már notar tæknina líka til að halda utan um skipulagið, t.d. með dagatali í símanum. Þannig fær hann tilkynningar beint í snjallúrið.
Þá eru einnig til lausnir fyrir leikhús. Ingólfur Már notar smáforrit í símanum (RogerDirect) til að tengjast hlustunarkerfum, svo sem tónmöskvum í leikhúsum. Tónmöskvi er þráðlaust hlustunarkerfi í sal sem sendir hljóðið beint í heyrnartækin án umhverfishávaða. Þetta er dæmi um tækni sem skiptir sköpum fyrir þátttöku heyrnarskertra, en heyrnarskerðing er einmitt dæmi um ósýnilega fötlun sem hefur djúpstæð áhrif á daglegt líf fólks. Á Íslandi eru um 12 þúsund heyrnartækjanotendur. Rannsóknir sýna að ómeðhöndluð heyrnarskerðing getur valdið einangrun og aukið líkur á heilabilun. Það er því mikið hagsmunamál að fólk geti nýtt tæknina til að styðja við daglegt líf.
„Þótt rauntímatextun sé ekki fullkomin nær maður samhenginu, sem er aðalatriðið.“
Stafræna byltingin hefur skipt sköpum fyrir heyrnarskerta. Sérstaklega má nefna sjálfvirka rauntímatextun, en slíkur skjátexti er notuður hjá RÚV og víðar. Ingólfi Má finnst rauntímatextun vera orðin nokkuð góð. Helsta áskorunin við textun í beinum útsendingum er þegar margir tala í einu, til dæmis í pallborðsumræðum. Þá getur textinn orðið óskiljanlegur. Því er mikilvægt að fundarstjórar stýri umræðum vel.
„ef það eru beinar útsendingar það eru kannski fjórir, fimm í pallborði. Það er spurningin um að stjórnendur stjórni liðinu, þannig að það sé ekki verið að grípa fram í. Því þegar tveir eða þrír eru að tala í einu þá næ ég ekki neinu, það fer bara allt í belg og biðu. „
Öll snjöll er samstarfsverkefni TMF og ÖBÍ þar sem við kynnumst fólki sem nýtir tækni á hugmyndaríkan hátt til að auka sjálfstæði sitt. Við deilum hagnýtum lausnum og sögum af því hvernig snjalltækni einfaldar hversdaginn og opnar nýja möguleika fyrir alla.